ब्रेकिंग

विदेश

वॉशिंग्टनमध्ये गोळीबार!

Samruddhi Dhayagude
22 May 2025

इस्रायली दूतावासातील दोन कर्मचारी ठार; संशयिताला घेतलं ताब्यात

वॉशिंग्टन डीसी येथील ज्यू संग्रहालयाजवळ बुधवारी संध्याकाळी झालेल्या गोळीबारात इस्रायली दूतावासातील दोन कर्मचाऱ्यांचा मृत्यू झाला. ही माहिती होमलँड सिक्युरिटी सेक्रेटरी क्रिस्टी नोएम यांनी दिली आहे. मेट्रोपोलिटन पोलीस विभागाने सांगितले की, या प्रकरणी एका संशयिताला ताब्यात घेतले आहे. या घटनेत एक पुरूष आणि एक महिला ठार झाली आहे.

ट्रम्प यांच्याकडून निषेध

अमेरिकेचे राष्ट्राध्यक्ष डोनाल्ड ट्रम्प यांनी या हल्ल्याचा निषेध केला आहे. ट्रम्प यांनी ट्रूथ सोशल वर पोस्ट केली आहे. “डीसी येथील हे भयानक हत्याकांड निश्चितपणे याहूदी-विरोधी भावनांवर आधारित आहे, या आत्ताच थांबल्या पाहिजेत! अमेरिकेत द्वेष आणि कट्टरतावादाला स्थान नाही. पीडितांच्या कुटुंबियांबद्दल सद्भावना,” असे अमेरिकेचे राष्ट्राध्यक्ष डोनाल्ड ट्रम्प म्हणाले.

इस्त्रायलचे पंतप्रधान बेंजामिन नेतान्याहू यांनी देखील वॉशिंग्टन येथे झालेल्या दोन इस्त्रायली कर्मचाऱ्यांच्या हत्येवर प्रतिक्रिया दिली आहे. तसेच हा गोळीबार धक्कादायक असल्याची भावना त्यांनी व्यक्त केली. तसेच जगभरातील सर्व इस्रायली दूतावासांमध्ये सुरक्षा वाढवली जाईल, असेही म्हटले. याहूदी विरोधी भावनेची आणि इस्त्रायलविरोधातील टोकाची चिथावणी याची भयानक किंमत आपण मोजत आहोत. इस्त्रायलविरोधातील ब्लड लिबेल्सची (Blood Libels) किंमत रक्ताने मोजावी लागत आहे आणि याचा शेवटपर्यंत सामना केला पाहिजे, असे नेतान्याहू म्हणाले आहेत.

सेक्रटरी नोएम यांनी एक्सवर केलेल्या एका पोस्टमध्ये दोन कर्मचाऱ्यांचा मृत्यू झाल्याचे म्हटले आहे. त्या म्हणाल्या की, वॉशिंग्टन डीसी येथील ज्यू संग्रहालयाजवळ आज रात्री दोन इस्त्रायली दूतावासातील कर्मचाऱ्यांची निर्घृणपणे हत्या झाली. आम्ही याची कसून चौकशी करत आहोत आणि अधिक माहिती मिळवण्यासाठी कार्यरत आहोत. कृपया पीडितांच्या कुटुंबियांसाठी प्रार्थना करा. आम्ही या प्रकरणातील गुन्हेगारांना त्यांच्या योग्य शिक्षेपर्यंत नेऊ.